NAGA CITY, CEBU-Dili mominos lima ka mga tin-edyer nga lalaki gikan sa dakbayan sa Naga, ang mag-atubang og kaso tungod sa giingong paglugos sa usa ka 16-anyos nga babaye niadtong Mayo 25.
Kini human ang Naga City Police Station gikatakdang mopasaka og kasong pagpanglugos batok sa mga menor de edad nga suspek nga gituohang nalambigit sa ‘gang rape.’
Sa pakighinabi sa Bombo-Newsteam kang Police Lt. Col. William Homoc, hepe sa Naga City Police, kini nibutyag nga aduna na silay naila nga pito ka mga lalaki nga pulos menor de edad.
Matud ni Homoc nga ilang ipasaka ang mga kaso karong Biyernes, Hunyo 2.
Wala gibutyag sa mga otoridad ang pagkatawo sa biktima ug sa akusado sanglit silang tanan mga menor de edad, ang biktima anaa karon sa kustodiya sa Department of Social Welfare and Development (DSWD) sa dakbayan sa Naga.
Ang insidente gikatahong nahitabo sa Barangay Jaguimit sa dakbayan sa Naga niadtong Mayo 15 diin ang biktima, 16-anyos nga Grade 10 student, miadto sa debut party sa iyang classmate.
Anaa usab ang mga suspek sa maong kalihokan, matod ni Homoc.
Dugang pa, nga nga adunay nahitabong pag-inom ug niapil ang biktima ug iyang mga higala.
Laing saksi usab miingon nga ilang nakita ang biktima nga gikarga sa usa ka motorsiklo sa duha ka mga lalaki ug ang sakyanan daling misibat paingon sa hilit nga dapit sa Barangay Jaguimit diin giingong nahitabo ang krimen.
Matod ni Homoc nga lima sa pito ka mga lalaki ang gikatahong nagpuli-puli sa paglugos sa biktima. Ang laing duha mao ang naghatod kaniya didto.
Pagkasunod buntag, Mayo 26, usa ka higala sa biktima ang nakakita kaniya sa ibabaw sa tangke sa tubig sa Barangay Jaguimit, ug midugang nga siya daw huyang ug wala sa iyang kaugalingon.
Dugang ni Homoc, nga kasamtangang gipaubos sa stress debriefing ang biktima nunot sa insidente.
