Patay ang usa ka pasahero ug labing menos 71 ang naangol human ang usa ka eroplano sa Singapore Airlines nakasinati og kaguliyang.
Gikan sa London ang naasoy nga eroplano sa dihang nahitabo ang insidente maong napugos kini sa paghimo og emergency landing sa Bangkok, Thailand.
Matod sa Director sa Suvarnabhumi airport sa Bangkok, usa ka British nga lalaki nga pasahero ang namatay ug gituohang gi-atake sa kasingkasing samtang anaa sa 30 ang gikatahong nakaangkon og grabeng samad sa ulo.
Ang maong eroplano, usa ka Boeing 777-300ER, adunay 211 ka mga pasahero ug 18 ka tripulante paingon sa Singapore dihang nihimo kini og emergency landing.
Matod sa pipila ka mga pasahero, pipila ka mga sakay sa eroplano wala magsul-ob og seatbelts sa dihang nahitabo ang turbulence.
Adunay kapin sa 200 ka mga pasahero ang eroplano, lakip niini, ang lima ka mga Pilipino.
Nangayo og pasaylo ang Singapore Airline sa maong insidente ug mipaabot sa pahasubo sa pamilya sa namatay nga pasahero.
Ingon man nga nipasalig ang kompanya sa airline nga mohatag sila og hinabang sa mga apektadong pasahero.
