CEBU CITY-Hingpit na nga gipasakaan ug kaso sa Criminal Investigation and Detection Group (CIDG-7) ang 5 ka mga estapador nga nasikop sa entrapment operation sa dakbayan sa Mandaue.
Kasong kapalapasan sa Security and Exchange Commission Code RA 8799 partikular na sa Section 8 ang gipasaka batok sa lima ka mga suspek.
Ang dinakpan mao ang chief executive officer sa investment scam nga Phoenix EA Holding International Incorporated nga si Ailyn Hopre Matulac nga taga Davao City.
Lakip usab sa mga nasikop mao sila si Arjon Gumban, taga North Cotabato; Cesar Ian Acenas, taga Cagayan de Oro City; Adjetor Daya Jr., taga Davao City ug ang kanhi Vice-Mayor sa maong dakbayan nga si Maria Esperanza.
Matud ni Police Major Edwin Lacostales sa CIDG-7 nga nagsugod ang operasyon sa Phoenix EA Holding niadtong nakalabay nga Abril sa Sugbo.Nailhan ang maong kompaniya kaniadto sa pangalan nga Blitz Unlimited Incorporated apan giilisan nila ang pangalan sa dihang adunay mikiha batok sa mga kadagkuan.
Dugang pa ni Lacostales nga small-scale estafa lang ang mapasaka batok niini gumikan kay usa lang ang complainant.
Samtang ang kasong large-scale estafa adto na mapasaka sa Mindanao sanglit nakapasaka naman ang complaint sa mga biktima ngadto ug huwaton nalang nga mugawas ang Warrant niini. (Lahvi Quiñones)
