Naugdaw ang dili moubos sa 50 ka mga panimalay human miulbo ang dakong sunog niadtong Biyernes sa hapon sa Sitio Lourdes, Brgy. Inayawan, sa dakbayan sa Sugbo.
Sa inisyal nga imbestigasyon sa Cebu City Fire Department, mitumaw ang ka’yo gikan sa panimalay sa magtiayong Clarissa ug Joseph Bonghanoy.
Nakadawat og alarma ang kabumberuhan sa takna nga 4:37 sa hapon kagahapon ug giisa kini ngadto sa third alarm.
Nakontrolar kini sa kabumberuhan pagkalabay sa dul-an usa ka oras.
Matud sa imbestigador nga si Fire Officer 2 Fulbert Navarro nga apektado ang halos 70 ka mga pamilya human sa maong sunog.
Moabot ngadto sa P100,000 ang danyos. Walay natalang casualties apan adunay usa nga samdan.
Giimbestigaran pa sa kabumberuhan kung unsa man ang hinungdan sa maong sunog.
