DUMANJUG, CEBU-PATAY ang usa ka negusyante og kahayupan ug mikuha sa tunga sa milyon ka pesos sa lungsod sa Dumanjug, habagatang bahin sa Sugbo niadtong Huwebes, Mayo 30, ning tuiga.
Giila ang biktima nga si Leonardo Pescadero Macario, 51-anyos, usa ka livestock trader o negusyante og mga hayop ug residente sa Kanyuco, Dumanjug.
Napalgan ang iyang lawas nga wala na’y kinabuhi kilid sa iyang gi-parking nga motorsiklo daplin sa dalan sa Brgy. Kanyuco nga adunay daghang samad pinusilan sa iyang ulo.
Gituohan sa kapulisan sa Dumanjug nga si Macario kay gi-ambush ug dayon gitulis tungod sa presensya sa usa ka troso nga natumba nga nibabag sa dalan.
Ang 24-anyos nga anak sa biktima nga si Jerico Macario mao’y nitaho sa kapolisan sa maong krimen.
Asoy sa anak nga naghuwat kini sa iyang amahan sa Mantalungon Livestock Market sa silingang lungsod sa Barili niadtong Huwebes sa buntag.
Apan, nilabay ang mga oras nakadesisyon kini nga mouli ug didto naabtan ang iyang amahan nga wala na’y kinabuhi, pipila ka metros gikan sa ilang panimalay.
Basi sa inisyal nga imbistigasyon, pasado ala 1 sa kaadlawon mibiya sa ilang balay si Leonardo aron mobiyahe paingon sa Mantalungon Livestock Market aron mamalit og mga hayop ug bitbit ang kwarta nga mokabat sa P500,000 nga nahanaw na sa dihang napalgan ang iyang patayng lawas.
Kasamtangang nagpahigayon og follow-up investigation ang kapulisan aron masubay ang ilhanan sa mga suspek.
