CEBU – Niugdaw sa 51 ka mga balay ug 57 ka mga pamilya nga nawad-an og pinuy-anan nga gilangkuban sa 260 ka mga indibidwal, ang usa ka duha ka oras nga sunog gabii Oktubre 31, sa Mananga 1, Purok Florentino, Barangay Tabunok, dakbayan sa Talisay.
Matud pa ni Fire Officer 3 Junriel Siaboc, chief investigator sa Talisay City Fire Station, nga padayon pa ang ilang gihimong imbestigasyon sa sunog, nga gibanabana nga mokabat sa P191,250 ang danyos sa mga kabtangan.
Dugang pa, nga temporaryong nagpuyo sa Covered Court sa Barangay Tabunok ang mga namakwit nga pamilya.
Matod niya nga ang sunog nagsugod sa balay sa usa ka Johnrey Borlasa ug paspas nga mikatap sa mga balay didto nga kasagaran ginama sa light materials.
Dugang pa niya nga walay naangol atol sa sunog ug ila pang gisusi ang hinungdan sa sunog.
Gikataho nga alas 8:52 sa gabii giisa dayon kini sa unang alarma alas 9:09 sa gabii, ilang giisa sa second alarm ang sunog.
Ug paglabay sa 15 minutos o alas 9:24 sa gabii, giisa pa kini sa 3rd alarm, nga nagpasabot nga daghan pang mga firetruck ang gipadala aron motabang sa pagpawong sa sunog.
Nakontrolar dayon ang kalayo alas 10:22 sa gabii, ug paglabay sa 28 minutos, gideklarar nga fire out.
