Moabot sa 52 ka mga barangay ang naapektuhan sa ashfall tungod sa padayon nga pagsaka sa aktibidad sa Mayon Volcano, sumala sa Office of Civil Defense (OCD) gahapon Sabado, Mayo 2, 2026.
Base sa report sa PHIVOLCS, ang sunod-sunod nga kalihokan sa bulkan hinungdan sa baga nga abo nga mitabon sa nagkalain-laing bahin sa Albay.
Mga alas 4:28 sa hapon, nahitabo ang pagkahugno sa lava sa kinatumyan sa bulkan, nga nakamugna og pyroclastic density currents (PDCs), ilabina sa Mi-isi Gully sa southwestern slopes.
Ang maong PDCs gibanabana nga miabot sa hangtod 4 kilometros, nga giisip nga pinakadako sukad sa katapusang pagbuto sa Mayon.
Sumala ni PHIVOLCS Director Dr. Teresito Bacolcol, ang bulkan nagpabilin sa Alert Level 3, nga nagpasabot sa magmatic unrest ug posibleng mas delikadong pagbuto.
Tungod niini, hugot nga gidili ang pagsulod sa 6-kilometro nga Permanent Danger Zone (PDZ).
Gitambagan ang mga residente nga magpabilin sa sulod sa balay kung adunay ashfall, magsul-ob og protective mask, ug sigurohon nga ang pagkaon ug tubig natabunan aron malikayan ang kontaminasyon.
Sa pagkakaron, nagpadayon ang koordinasyon tali sa OCD, PHIVOLCS, ug mga lokal nga gobyerno aron masiguro ang kaluwasan sa mga apektadong residente.
Ang mga barangay nga naapektuhan sa ashfall naglakip sa mga lungsod sa Camalig, Guinobatan, Daraga, ug Legazpi City, diin gipadala usab ang mga boluntaryo ug disaster response teams alang sa dinaliang tabang.
