Usa ka 59-anyos nga motorcycle driver ang anaa sa kritikal nga kondisyon human giingong mipasutoy samtang red light pa ug nabangga sa laing motorsiklo sa interseksyon sa P. Del Rosario ug Junquera streets sa Barangay San Antonio, Cebu City, pasado alas 8:58 sa gabii niadtong Biyernes, Agosto 21, 2026.
Giila ang driver nga si Segundo Butaya, 59, residente sa Catarman, Liloan, nagmaneho og Honda Click ug gidala sa Cebu City Medical Center (CCMC).
Giila usab ang iyang 18-anyos nga back rider, nga si Warren Tudlas, lumad nga taga Ginatilan, nakaangkon og gamay nga mga samad samtang, ang drayber sa Yamaha Mio nga nabanggaan ni Butaya, giila nga si Richard Gabrillo, 50, taga Sitio Ipil, Barangay Basak San Nicolas, nakaangkon usab og gamay nga mga samad.
Base sa imbestigasyon sa Traffic Enforcement Unit sa Cebu City Police Office ug footage gikan sa Eagle Eye sa Cebu City Government, ang motorsiklo ni Gabrillo mihunong tungod kay pula pa ang traffic light sa Junquera Street padulong sa downtown area.
Sa dihang nahimong berde ang traffic light, inanay nga mipadagan si Gabrillo, apan, si Butaya, kinsa kusog nga nagdagan sa P. Del Rosario Street padulong sa South Bus Terminal, giingong kalit nga milabang sa intersection bisan pa sa pula nga suga, nga miresulta sa pagkabangga.
Tungod sa kakusog sa impact, natumba ang duha ka motorsiklo ug nalabay sa kadalanan.
Sa pagkakaron, padayon pa nga nagpa-alim sa tambalanan si Butaya.
