NEGROS ORIENTAL- Nawala ang unom ka mga langyaw human nag-hiking sa Valencia, Negros Oriental karong semanaha.
Subay sa gi-post sa Valencia Police Station, NOPPO, nga nawala ang mga langyaw nga hiker ug sa impormasyon nga gihatag, sila mibiya alas 8 sa buntag niadtong Marso 19 gikan sa Sitio Lunas, Brgy. Malabo, Valencia.
Giila sila nga si Alexander Radvanyi, British; Torsten Martin Groschupp, German; Alwin Fink, German; usa ka “Wolfgang,” German; usa ka “Terry,” Canadian; ug Anton Chernov, Russian.
Basi sa pakigsusi sa Kapulisan nag-hiking sila sa sikat nga twin lakes trail sa probinsya niadtong Miyerkules sa buntag ug napakyas sila sa pagbalik sa ilang giabangan nga balay.
Dugang pa, nga ang ubang mga bisita sa balay nitaho nga nawala sila pagkasunod adlaw.
Gipangita sa Local Risk Reduction and Management Offices sa Valencia ug Sibulan ang mga nawala sa tabang sa daghang mga organisasyon.
Gipahibalo sa Valencia, Negros Oriental PERUV Team nga ipadayon nila ang search and rescue operation karong adlawa, Marso 21, human kini gisuspenso sa miaging gabii tungod sa kusog nga ulan.
