DANAO CITY – Gipaabut na lang sa Philippine Coast Guard-Danao ang marine protest sa kapitan sa barko sa MV Mika Mari-IV human sa nahitabung insidente kagahapung adlawa sa roro port sa dakbayan sa Danao.
Gibutyag ni Lt. Junior Grade Michael Encina, tigpamaba sa PCG, nga gisuspenso una ang pag-byahe sa maong barko hangtud nga dili makahatag ug marine protest ang kapitan sa barko.
Matud pa nga ang insidente walay kalabutan sa bagyong Falcon gumikan kay linaw man lang ang dagat ug gani wala may gale warning.
Subay niini, gituhu-an sa PCG nga human error ang rasun sa nahitabu.
Kahinumduman nga kagahapun sa hapon, natagak ang usa ka 6-wheeler truck nga adunay kargang 400 ka sako sa mais, sa dagat human kini nga na slide sa ramp sa nahisgutang roro vessel.
Basi sa inisyal nga imbestigasyon, naputul ang pisi nga naka-konektar sa roro ug sa pantalan hinungdan nga napunta sa dagat ang ramp ug napa-atras ang roro ug hingpit nga natagak. (SBR)
Hinu-un, luwas lang ang driver ug ang mga sakay sa truck, samtang natabang pa usab pagkuha ang 200 ka mga sako sa mais.
