Makapanglimbawt sa balhibo ang nahitabong disgrasya sa Sitio Maaslom, Barangay Busay, niadtong Martes sa hapon, Marso 10, 2026, gumikan nakapupo kini og upat ka kinabuhi ug aduna pay nagpabiling kritikal.
Subay niini, eksklusibong gikab-ot sa Bombo Radyo Cebu newsteam ang habig sa duha sa mga responders sa maong maduguong disgrasya nga sila si John Dexter Suta ug Welbert Sayson Jr., diin iyang giasoy nga ang maong 6 wheeler wing van nga gagikan pa sa kaulohan ug niabot sa Sugbo niadto pang Lunes, Marso 9, diin ang sulod niini nga maong van kay mga medisina alang sa mga pananom ug usa ka NMAX nga motor.
Gikabutyag usab ni Suta nga gidaro sa wing van kining kasugat nga habal-habal nga adunay sakay nga 3 kabuok, nga unta padung ang rota sa bukid, gumikan sa giingong dili na kontrol ang manobila niini tungod kay nabasiyo naman ang preno o break sa maong wing van.
Dugang asoy ni Suta, sa dihang anaa na sila sa dapit diin nahitabo ang disgrasya, ila nang na-abtan nga wala nay kinabuhi ang tanan nga sakay atong habal-habal lakip na ang drayber niini, samtang ang drayber sa wing van napiit sa front seat ug ang manobila niini anaa na sa dughan nga dapit.
Samtang, nahinabi usab ni Suta ang usa kakauban sa maong drayber sa wing van, ug niasoy kini nga samtang nagbyahe sila, nag ingun na ang drayber niini nga nawad-an na og break ang ilahang gisakyang 6 wheeler wing van.
Hinungdan nga nisuway pa kini og layat sa wing van, apan wala mahimo gumikan kay naglisud kini tungod sa kakusog na sa dagan.
Busa, sa dihang nabangga na ang gisakyang 6 wheeler wing van ngadto sa habal-habal, nalabay kini sa kanal ug wala na kamatngon kung aduna ba silay na banggaan diay nga motor nga nakasugat niini.
