CENTRAL VISAYAS- Pormal nang nanumpa ang anaa sa 600 ka mga bag-ong police patrolman ug patrolwomen para sa ilang graduation ug oath-taking ceremony sa Regional Training Center – Central Visayas (RTC-7) sa Barangay Jugan, lungsod sa Consolacion, sa amihanang Sugbo Huwebes sa buntag, Disyembre 19, 2024.
Gilangkoban kini sa 488 ka mga lalaki ug 112 ka mga babaye diin iyang seremonyas gipanguluhan ni Police Brigadier General Constancio Chinayog Jr., ang Officer-in-Charge sa Directorate for Personnel and Records Management nga gikan sa Kampo Crame sa kaulohan.
Gipahinumdoman ni PBGen. Chinayog ang mga recruit sa ilang responsibilidad sa pagsunod sa balaod ug paglikay sa bisan unsang kahiwian, ilabi na kay anaa pa sila sa probation atol sa training period.
Gihatagan pa niya og gibug-aton nga ang mga recruit nga moapil sa dili maayong pamatasan kay daling matangtang sa serbisyo.
Ang training program naglakip sa unom ka buwan nga intensive training sa RTC-7 nga gisundan sa tulo ka buwan nga field training program diin sila ipakatap sa nagkalain-laing police stations, sa dili pa mobalik sa RTC-7 alang sa dugang training, ug unom ka buwan nga PNP Scouting sa lungsod sa Sibonga, sa habagatang Sugbo.
Human makompleto ang tanang training sessions, ang mga recruit permanenteng madestino sa nagkadaiyang police stations sa Central Visayas.
