Gikatakdang moabot sa Ninoy Aquino International Airport karong Huwebes, Mayo 9 ang 61 ka mga overseas Filipino workers gikan sa Israel nga naapektuhan sa gubat.
Matud pa ni Department of Migrant Workers (DMW) Secretary Hans Leo Cacdac nga ang maong grupoha ang pinakadako nga ihap nga naka-avail sa boluntaryong repatriation program sa gobyerno sukad miulbo ang panag-away niadtong Oktubre sa miaging tuig tali sa Israel ug sa militanteng Palestinian group nga Hamas.
Kauban ni Cacdac ang DMW ug ubang opisyal sa gobyerno arun sa pag-abi-abi sa mga OFWs nga moabot sa NAIA Terminal 3 sa Pasay City.
Sukad niadtong Oktubre 2023, wala gitangtang sa Department of Foreign Affairs ang Alert Level 2, nga gi-isyu kung adunay tinuod nga mga hulga sa kinabuhi, seguridad, ug kabtangan sa mga Pilipino nga naggikan sa internal nga kasamok, instability, o mga external threats.
Sa pagkakaron, ang datus sa buhatan sa DMW nagpakita nga sa Enero ning tuiga, adunay 463 ka mga OFWs sa Israel ang ni-avail na sa boluntaryong pagpauli.
