CEBU CITY-Miugdaw sa dili muminos 43 ka mga panimalay ang sunog nga mitumaw sa Sitio San Isidro ug Lumboy sa Barangay Inayawan ning dakbayan sa Sugbo pasado alas 2:30 adlaw nga Sabado, Abril 5, 2025.
Sumala sa report sa kagamhanang dakbayan sa Sugbo pinaagi sa buhatan niini sa Department of Social Welfare Services (DSWS) nga dili muubos sa 61 ka mga pamilya ang nawad-an sa ilang panimalay tungod sa maong sunog nga nakapabutang sa kapin 234 ka mga indibidwal ang nabiktima sa katalagman.
Gani sumala sa inisyal nga imbestigasyon sa kabumberohan sa dakbayan nga miabot sa P700,000 ang kinatibuk-ang danyos sa sunog nga midilaob sa mga panimalay sulod sa 800 square meter area ug 43 ka mga istruktura ang naugdaw.
Maayo nalang og walay nakutluan og kinabuhi sa maong katalagman apan adunay usa ka ginang ang nakahiagom sa 2nd degree burn sa iyang wala (left) nga kamot.
Kasamtangang anaa sa Inayawan Gym ang mga biktima diin daling midalit ang DSWS ug supporta sama sa pagkaon ug tubig nga makunsomo sulod sa 3 ka adlaw, temporary shelter (evacuation center ug modular tent), construction materials, medical/psychosocial/legal/financial assistance.
