CEBU CITY-Gipahunong ang 7 infrastructure projects sa Metropolitan Cebu Water District (MCWD) nga nagkantidad og kapin P235 milyon sa Commission on Audit (COA).
Kini gumikan sa wala natuman nga target completion sulod sa contract period.
Pipila sa mga gipahunong nga mga proyekto mao ang Mactan Water System Improvement program (MWSIP), Pipeline expansion sa Wilson Drive, Pasteur St., Barangay Lahug, Cebu City, ug ingon man ang Transmission line nga nagsubay sa Lobregat Property sa Barangay Busay hangtud sa JY Square sa Barangay Lahug, Cebu City.
Matod sa COA, nga ang maong kapakyasan naghikaw sa mga ‘concessionaires’ sa mga benepisyo nga makuha unta gikan sa dinaliang paggamit sa maong mga proyekto.
Ningpadangat usab ang MCWD nga adunay daghang rason sa pagkalangay sa mga gihisgutang proyekto.
Lakip na niini ang pagkalangay sa pag-isyu sa ‘excavation permit’ sa mga hingtungdan nga local government units (LGU) ug Department of Public Works and Highways (DPWH), pagdumili o protesta sa duol nga mga residente bahin sa ang mga pipe-laying projects, interbensyon gikan sa traffic management office sa LGU, ug ingon man dili maayo nga kahimtang sa panahon.
