CEBU CITY-Nakapyansa na ang 7 ka mga indibidwal kinsa nangilad sa anaa sa 100 ka mga senior citizens pinaagi sa pagpamaligya og haplas.
Kini human sila natanggong sa detention facility sa Dakbayan sa Naga.
Gitino ni Police Lieutenant Colonel William Homoc, ang hepe sa Naga City Police Station nga nakapyansa ang mga suspetsado og 6,000 matag usa niadtong, Disyembre 19, 2023.
Sa pag-asoy sa hepe sa modus sa maong grupo sa mga indibidwal ngadto sa mga senior citizens sa Naga City, nasayran nga i-timing sa mga suspetsado nga bag-o lang nag-payout ang mga senior citizens una himuon ang maong pagpangilad.
Kung diin, magpakaron ingnon kini nga nanghatag og haplas apan, isip baylo, nangayo kini og donasyon nga nagkantidad og P299.00 ug laing P199.00 alang sa sulod sa haplas.
Kini nagpasabot nga dul-an sa P500.00 ang nakuha sa mga suspetsado gikan sa anaa sa 100 ka mga senior citizens.
Subay sa maong balita, giila ang mga suspetsado nga sila si Ronald Belocura Alegre, 45-anyos ug Richard Salibio Luces, 25-anyos, nga taga Centro Lagundi, Oslob, Cebu; Janel Belocura Alegre, 27-anyos, nga taga Tindog, Medellin, Cebu; Gilbert Belocura Alegre, 35-anyos nga taga Dakbayan sa Toledo, ug ingon man sila si Boboy Lojario, Angelina Lojario Batomalaque, ug gi Marlinda Sicop Betchido, nga lumad nga taga Dumaguete, Negros Oriental.
