Pito ka tawo ang namatay ug kapin sa 100 ang naangol human nagbangga ang duha ka tren sa Giza, Egypt, niadtong Domingo, Nobyembre 8.
Lakip sa mga namatay ang drayber sa usa sa mga tren, sumala sa pagkumpirma sa ministeryo sa panglawas sa maong nasud.
Matod sa mga awtoridad, nahitabo ang insidente dihang nagbangga ang duha ka tren—nga nagbiyahe paingon sa habagatan gikan sa Giza ug Cairo—hinungdan nga ang pipila ka bagon nanggawas sa riles ug nahulog sa pangpang.
Gimandoan ni Egyptian President Abdel Fattah al-Sisi ang mga awtoridad nga imbestigahan ang insidente ug tukion kon kinsa ang angay manubag niini.
Gibutang sa “heightened alert” ang mga ospital duol sa nahitaboan sa bangga tungod sa pagdagsang sa mga pasyente.
Dugang pa sa mga awtoridad nga posible pang motaas ang gidaghanon sa mga namatay.
Ang Egyptian Red Crescent, usa ka humanitarian organization nga nakabase sa Cairo, nagtabang sa mga naangol pinaagi sa paghatag og first aid ug suportang sikolohikal alang sa mga biktima ug sa ilang mga pamilya.
Gisuspinde ang operasyon sa mga tren tali sa Giza ug Upper Egypt aron mahatagan og dalan ang clearing operations o pagtangtang sa mga naguba nga bahin sa tren, samtang wala pa gitino sa gobyerno kon kanus-a mahuman kini nga mga trabaho.
Pipila ka silingang mga nasud ug organisasyon, lakip na ang Ministry of Foreign Affairs sa Saudi Arabia ug ang Turkish Embassy sa Egypt, ang nagpadayag sa ilang pahasubo.
