Nanawagan ang abogado sa tawhanong katungod ug kanhi Bayan Muna Party-list Representative nga si Atty. Neri Colmenares nga mapadali ang mga proseso batok kang kanhi Presidente Rodrigo Duterte, tungod kay nagkagamay na ang nahabilin nga panahon.
Kini ang gipaambit ni Atty. Colmenares atol sa pakighinabi sa Bombo Newsteam nga andam sila nga dawaton nga tangtangon ang mga balik-balik nga testimonya aron dili na madugay og maayo ang proseso sa pagdungog.
Gihatagan usab niya og gibug-aton nga ang paspas nga pagtapos sa husay kay maoy labing makahatag og kaayohan sa mga biktima ug sa ilang mga pamilya.
Ingon man nga gipunting sa abogado nga ang kamahinungdanon sa pagtapos sa kaso samtang buhi pa ang kanhi presidente, ilabi na gumikan sa iyang edad ug kahimtang sa panglawas. Nagpasidaan usab si Colmenares nga kung adunay dili maaying mahitabo kang Duterte samtang nagpadayon pa ang kaso, mahimo kining i-dismiss o mawad-an na og bili, nga moresulta sa pagkawala sa higayon nga makab-ot sa mga nagreklamo ang hingpit nga hustisya.
Dili usab nila ihikaw sa kanhi Presidente ang iyang katungod sa hustong proseso sa balaod kay matud ni Colmenares, bisan pa man og gihikawan sa kanhi presidente ang mga biktima kaniadto niini sa katungod, ang mga pamilya sa mga biktima angay gihapong hatagan og higayon nga mopresentar sa ilang mga ebidensya ug testimonya sa korte.
Gipasabot sa abogado nga bisan unsa pa man ang mahimong desisyon sa korte—kon pag-abswelto o pagkondena—ang labing importante mao ang pagtugot nga modagan ang opisyal nga proseso sa balaod.
Gipasiugda usab ni Colmenares nga ang husay adunay dakong bili alang sa mga pamilya sa mga biktima, tungod kay magsilbi kini nga opisyal nga rekord kon giunsa pagpatay ang ilang mga minahal sa kinabuhi nga walay kalooy o pagbati.
