Laing nagpamatuod nga dili babag ang edad sa usa ka tawo arun sa pagkab-ot sa diploma.
Mao kini ang gipamatud-an ni Rudy “Jao” Nicolas E. Sucgang, 72-anyos nga senior high school student, nailhan usab nga, “Nong Rudy,” kinsang bag-o lang nga migraduwar sa NAPTI Integrated School (NAPTI-IS) sa Batan, Aklan.
Nakaani kini og positibong reaksyon sa mga netizens human ang iyang litrato sa iyang graduation ceremony gi-post ni Carmen Dalida Selorio, magtutudlo sa nasangpit nga institusyon.
Matud kang NAPTI-IS School Principal – 1, Evan Regalado, si Lolo Rudy, usa sa ka kanhi-estudyante sa Kalantiaw Institute ug nakitaan na kini og determinasyon nga mopadayon ug mohuman sa iyang secondary education.
Hinungdan nga gihatagan kini og benepisyo ug higayon nga maka-enroll ubos sa programang TVL Track, nga nagpili sa Agri-Fishery Arts nga adunay Aquaculture isip iyang espesyalisasyon.
Pinaagi sa kakugi ug paglahutay, nakahuman si Lolo Rudy sa iyang pagtuon diin tumong niini kay makab-ot ang standard sa higher government position ug moserbisyo sa komunidad.
Nasayran usab nga usa ka kanhi kagawad si Lolo Rudy apan napakyas nga mahimong miyembro sa Sangguniang tungod sa iyang kaagi, ug karon nga nakab-ot na niya ang malampusong paningkamot nga mahimong senior high graduate, padayon niyang giabot ang iyang mga pangandoy nga makaalagad sa iyang isigkatawo ug makalingkawas sa kawad-on.
