CEBU CITY- Mitumaw ang usa ka dako nga sunog sa residential area sa Sitio Mc Arthur, Barangay Tejero, diin naugdaw ang 30 ka mga balay samtang 9 pa ang napartial damage, Miyerkules, Setyembre 17, 2025.
Sumala sa pinakabag-ong datos nga nakuha gikan sa Bombo Radyo Cebu Newsteam, ang insidente nakaapekto sa 72 ka pamilya nga naglangkob sa 307 ka mga indibidwal.
Matod ni SFO3 Wendel Villanueva, tigpamaba sa Cebu City Fire Station – Region 7, ang sunog nagsugod alas 3:10 sa kaadlawon.
Gisundan kini sa unang alarma alas 3:26, dayon ang ikaduhang alarma ug sa katapusan ang ikatulong alarma.
Nakontrol ang kalayo sa alas 4:40 sa buntag.
Gibanabana nga ang sunog nakaapekto sa total nga 39 ka mga balay ug nagkantidad og kapin sa Php 1.35 milyon ang kadaut.
Maayo nalang nga walay na-report nga nasamdan o namatay tungod sa insidente.
Ang Bureau of Fire Protection (BFP) nigamit og 12 ka fire trucks, usa ka ambulansya, ug 15 ka auxiliary responders aron mapadali ang pagpatay sa kalayo.
Gipangulohan ang imbestigasyon sa sunog ni SFO1 Derek B. Cordova samtang si FO1 Jeric Baquiano ang Fire Code of Safety officer sa maong lugar.
Padayon pa ang imbestigasyon aron masuta ang hinungdan sa sunog.
