LAPU-LAPU CITY- Ni-ani ug nagkadaiyang komento reaksyon ang usa ka 73-anyos nga senior citizen nga midawat sa hagit ni Lapu-Lapu City Mayor Junard “Ahong” Chan human siya nagpatuli niadtong Biyernes, Hulyo 28, 2023, atol sa “Libreng Tuli” nga programa sa dakbayan nga gipahigayon sa Hoops Dome sa Barangay Gun-ob.
Giila ang senior citizen nga si Tatay Mado nga taga-Zone Pansat, Brgy Calawisan nga midawat sa hagit nga magpatuli ingun man gidawat usab niini ang incentives nga P20,000 isip bugti sa maong buhat.
Nasayran nga ang 73 anyos nga tiguwang adunay 7 ka mga anak ug 62 kabuok apo.
Wala makapugong ang edad sa pagsanong sa panawagan nga “Walay apo ni Lapulapu nga pisot”. Apan matud pa ni Mayor Chan nga murag dili na apo ni Lapulapu si Tatay Mado,basin ug ig-agaw na kini gumikan sa iyang pangidarun.
Sa sinugdanan, si Chan nitanyag og cash incentive nga P10,000 sa mga 20 anyos pataas, kinsa magpatuli sa maong aktibidad.
Hinuon, gidoble ni Chan ang cash incentive sanglit senior citizen na si Tatay Mado.
Gawas kaniya, laing tulo ka mga Oponganon, nga nagpanuigon og 20 anyos pataas, nakadawat og P10,000 matag usa.
