CEBU CITY-Mokabat sa 74 ka mga opisyal sa Barangay ug Sangguniang Kabataan (SK) sa dakbayan sa Lapu-Lapu ang negatibo sa paggamit og drugas atol sa gipahigayong random drug test sa City of Lapu-Lapu Office for Substance Abuse Prevention (CLOSAP).
Gipahigayon ang drug test niadtong Lunes, Disyembre 11, 2023, sa Social Hall sa Department of Education (DepEd) Lapu-Lapu City sa Barangay Poblacion.
Gibutyag ni Garry Lao, executive director sa CLOSAP, nga sa wala pa ang testing, ang CLOSAP nipahigayon og usa ka adlaw nga training session sa Strengthening Institutional Capacities sa Barangay Anti-Drug Abuse Councils (SICAP-BADAC).
Ang maong kalihokan gitumong sa pagpalig-on sa mga kahanas ug pagpahibalo sa mga lokal nga lider nga mipasalig sa pagsumpo sa pag-abuso sa substansiya.
Dugang niini, ang maong aktibidad gitumong usab sa pagrepaso sa drug-cleared status sa matag barangay.
