CEBU – Mukabat na lang sa 75 ka mga fixed ug floating cottages ang nagpabilin sa kadagatan sa Barangay Catarman ug Poblacion sa Cordova, Cebu gikan sa 500 nga gimandong gub-on niadtong Setyembre 2022.
Kini ang gibutyag ni Cordova Mayor Cesar ‘Didoy’ Suan human nga gipirmahan niini ang usa ka executive order nga nagdili sa pagtukod sa maong mga istruktura.
Matud pa, kung dili mulihok ang lokal nga kagamhanan, giingong mawad-an ug panginabuhi-an, ingon man tinubdan sa isda ang mga mananagat.
Gilauman sa mayor nga wala na’y makita nga mga istruktura sa mga musunod nga adlaw sa naasoy nga area human nga nagpadayon ang demolisyon.
Hinuon, gitino ni Suan nga ibalik ang mga butang nga mahimo pang magamit sa mga tag-iya sa maong mga fixed ug floating cottages.
Samtang, giawhag sa gihapon sa opisyal ang mga turista nga mubisita sa Cordova gumikan kay aduna pa’y mga pangpubliko nga dagat sa Barangay Poblacion ug Buagsong, ingon man alang sa mga maka-afford, aduna pa’y mga pribado nga resort sa lungsod ug mga island-hopping sites.
