CEBU CITY – Naluwas sa mga sakop sa City Intelligence Branch (CIB) sa Cebu City Police Office (CCPO) ang walo ka menor de edad, samtang ang sikop ang laing upat ka mga kauban niini atol sa gipahigayon nga buybust operation kagahapong adlawa.
Gibutyag ni C/Insp Christopher Navida nga ang subject sa ilahang operasyon mao si May Marie Jakosalem, 19 anyos ug anaa lang manimuyo sa dalan Colon, dakbayan sa Sugbo.
Matud pa nga gigamit niini ang mga menor de edad isip mga drug couriers diin giingong maka-dispose kini matag semana og 50 ngadto sa 70 ka gramos matag semana.
Atol sa maong operasyon nakuha gikan sa mga dinakpan ang 4 ka medium size ug 16 ka small size nga pakete sa shabu diin motimbang og 120 gramos ug mukabat sa gibana-bana nga tunga sa milyon.
Sa pagkakarun gikustodiya sa CCPO ang mga dinakpan samtang gikatakda usab nga makig-alayon ang CIB sa DSWD alang sa mga menor de edad nga ilahang na rescue.
Nagkanayon si Navida nga ilaha karung lantawon kung aduna pa ba’y lain nga grupo nga mugamit og mga menor de edad sa iligal nga transaksyon.
