Gikumpirma sa mga awtoridad nga labing menos 82 ka tawo ang namatay human sa coal mine gas explosion sa probinsya sa Shanxi sa China, sukwahi sa naunang report nga 90.
Nahitabo ang aksidente niadtong Biyernes sa gabii sa coal mine sa Liushenyu sa siyudad sa Changzhi, sumala sa report sa Xinhua.
Sa usa ka bag-o nga briefing, gikumpirma sa mga opisyal nga 82 ka tawo ang namatay, kapin sa 120 ang naospital, ug duha pa ang nawala.
Gihulagway sa mga awtoridad ang sitwasyon human sa pagbuto nga “chaotic” samtang nagpadayon ang imbestigasyon sa hinungdan sa insidente.
Giingon sa mga opisyal nga “serious violations” ang nakit-an sa mga operasyon sa minahan, apan wala pa nila gipagawas ang kompletong detalye sa mga kalapasan.
Liboan ka mga rescuer ug medical personnel ang gipadala dayon sa lugar aron motabang sa mga operasyon sa pagpangita ug pagluwas.
Daghan sa mga nasamdan ang naapektuhan sa makahilong gas, sumala sa report sa state broadcaster.
Gimando usab ni Presidente Xi Jinping sa China ang hinanaling pagluwas sa mga nawala ug nanawagan alang sa usa ka hingpit nga imbestigasyon aron manubag ang mga nalambigit sa pinakagrabe nga katalagman sa pagmina sa China sulod sa kapin sa 15 ka tuig.
Samtang, migawas ang mga taho bahin sa mga paglapas sa mga protocol sa kaluwasan sa minahan sa karbon, lakip ang giingong dili pagsunod sa mandatory tracking devices para sa mga trabahante ug dili makanunayon nga mga blueprint sa pagmina nga gihatag sa mga awtoridad.
Giingon usab sa media sa estado nga ang gidaghanon sa mga tawo sa sulod sa minahan sa panahon sa pagbuto lagmit doble sa giingon sa opisyal nga mga rekord sa kompanya, nga nagpalala sa sitwasyon alang sa mga operasyon sa pagluwas.
