DUMANJUG, CEBU-Giklaro sa kapulisan nga ang 84-anyos nga babaye nga napalgang patay sulod sa iyang panimalay sa Dumanjug, Cebu wala giputlan og ulo, sukwahi sa unang mga taho.
Giila ang 84-anyos nga si Miguela Pocong Barino, lumupyo sa purok Santa Felomina Brgy. Candabong lungsod sa Dumanjug.
Matud ni Police Captain Eden Rex Baguio, hepe sa Dumanjug Police Station nga anaa na sa advanced state of decomposition ang senior citizen ug gituohan nga ang mga libud-suroy nga iro maoy nikitkit sa patay’ng lawas hinungdan nga naputol ang ulo.
Dugang pa, basi sa ilang imbestigasyon, ang mga awtoridad namahayag nga dako ang posibilidad nga giatake sa kasing-kasing ang maong tiguwang.
Gikompirmar sa kapolisan nga walay timailhan nga adunay pwersa nga nahitabo sulod sa pinuy-anan sanglit ang kuwarta ug kwintas sa biktima nakit-an nga wala hilabti sa iyang tupad.
Sa pakighinabi sa Bombo Radyo Cebu kang Estilita Pocong, kinsang asawa sa igsoon sa 84-anyos nga lola diin gipaambit niini nga imposible nga adunay nagpatay sa lola tungod kay anaa raman ang kwarta ug mga bugas sa balay sa biktima.
Gidugang pa niini nga sa mga nakalabay nga buwan kapila na usab kini nga gitabang gumikan makuyapan lang kini og kalit.
Subay niini, nagkasabot ang mga kabanay nga ilubong dayon si Barino tungod lain na ang baho niini.
