CEBU CITY-Padayong nagpaalim ang usa ka 84 anyos nga lolo human gitigbas sa iyang 54 anyos nga trato tungod sa wala pagkasinabtanay diha sa may Purok 7 Brgy. Daang Lungsod,dakbayan sa Toledo, Cebu.
Giila ang biktima nga si Wilfredo Tribunalo samtang ang iyang trato giila ngasi Maria Garing Del Rosario nga parehong residente sa naasoy nga lugar.
Matud ni SPO1 Roxam Enerio sa Toledo PS nga nasuko si Tribunalo sa iyang hinigugma tungod kay wala kini misanong sa iyang imbitasyon para sa usa ka salo-salo.
Nag-ihaw pa matud og manok ang tiguwang apan wala mi-abot iyang trato.Tungod niini gikulata matud pa sa lolo ang iyang hinigugmang si Maria hinungdan nga mikuha kini og sundang ug gitigbas ang tiguwang.
Giingong miabot usab ang ig-agaw ni Maria nga si Nestor Garing ug mitabang pa sa pagkulata sa tiguwang diin mikuha matud pa kini og gahi nga butang og gipukpok sa ulo sa biktima.
Naka-angkon og daghang samad tinigbasan sa liog, nawng ug lawas ang lolo apan dali kini nga nadala sa tambalanan og padayon karong gi-atiman sa doktor.
Nasayran nga habol matud pa ang naasoy nga sundang hinungdan nga wala maputuhi ang lolo.Nasikop usab dayon ang duha ka suspek ug tanggong karon sa Toledo PS.
