Gipatuman dayon sa Philippine National Police (PNP) ang walo ka oras nga duty sa matag pulis, gikan sa miaging 12 ka oras.
Matod ni PNP chief Gen. Rommel Francisco Marbil, ang 12 ka oras nga kanhing duty sa kapulisan hinungdan nga wala silay panahon sa ilang mga pamilya.
Gipasabot sa opisyal nga mahimo usab kini nga hinungdan nga ang mga pulis mangatulog sa ilang mga police station.
Dugang pa ni Marbil, kabahin usab kini sa iyang kamandoan nga mopakatap og mas dakong porsiyento sa kapulisan sa kadalanan.
Una sa gimando sa heneral nga 85% sa mga polis kinahanglang anaa sa kadalanan nga magpatrolya.
Kining 85% mogahin ug anaa sa 197, 200 ka mga pulis sa kadalanan sa nasod.
Matod ni Gen. Marbil, nga kini nga mga Police Personnel ilang hatagan ug walo na lang ka oras nga duty aron human sa ilang katungdanan makapauli na sila sa ilang mga pamilya.
Ang heneral niinsistir, nga ang mga pulis kinahanglang mag-uban sa ilang kaugalingong pamilya, ug matod niya dili gyud kini ihikaw sa liderato sa kapolisan.
