Gikumpirmar sa National Bureau of Investigation Central Visayas Regional Office (NBI-CEVRO) ang unang natala nga cybergrooming sa Sugbo, diin usa ka hamtong nga lalaki nga nagpakaaron-ingnon nga fan ang mi-target sa 9-anyos nga batang babaye.
Matud ni NBI Investigation Agent III ug Media Liaison/Spokesperson Maria Contessa Lastimoso nga ang biktima kay aktibo sa TikTok ug kanunay nga nag-post og dance videos. Dinhi na nagpaila ang lalaki nga usa ka fan ug giingong gikuha ang pagsalig sa bata pinaagi sa pagpahayag og ‘appreciation’ apan nisangpot kini sa pagpahayag ug paghulagway sa menor de edad nga “sexy” ug “hot” nga giisip na nga dili makaangayon.
Sa pagkakaron, padayon ang imbestigasyon sa NBI aron matultol ang suspek, samtang gipahinumdoman ang mga ginikanan sa pagmonitor sa online activities sa ilang mga anak ug pag-report dayon sa posibleng online exploitation.
Nagpasidaan usab ang NBI sa mga ginikanan bahin sa nagkadako nga hulga sa online grooming nga mahimong mosangpot sa sexual exploitation ug uban pang mga porma sa kapintasan batok sa mga bata.
Ingon man nga giawhag niya ang mga ginikanan nga magmabinantayon ug magmintinar og abli nga komunikasyon sa ilang mga anak aron malikayan ang online grooming ug uban pang matang sa cyber exploitation.
