Nasikop sa mga sakop sa kapulisan ang anaa sa 9 ka mga notadong kawatan nga gikan pa sa Metro Manila didto sa usa ka mall sa Barangay Mambaling ning dakbayan sa Sugbo niadtong Miyerkules, Hulyo 9, 2025.
Ang maong mga kawatan kay sakop sa organisadong grupo sa kriminalidad nga Lavistre group diin nasakpan nga nanguha og mga branded nga mga sinena niadtong adlawa.
Ang unang nadakpan sa mga security guards sa maong mall nga giturnover nila sa Mambaling Police Station kay giilang si Angelica Capales, 35-anyos nga taga Quezon City.
Siya kay nakuhaan og mga branded nga sinena nga wala mubayad sa cashier hinungdan nga gidako kini.
Apan sa imbestigasyon sa Mambaling Police kay mitug-an na kini nga adua pa diay siyay laing mga kauban nga pulos sab mga taga Metro Manila nga gipangtudlo niya hinungdan nga gipangtultol dayon kini.
Paspas nga nakalusad og follow-up operation ang mga kapulisan diin ana sa 8 ka mga tinudlong kakunchabo ang ilang nahipos.
Ang maong 8 kay giilang sila:
Marilyn Traspaderme Lavistre, 37-anyos;
Liza Lavistre, 38-anyos;
Nekia Lavistre Francisco, 20-anyos;
Mark Talinio Castillo, 40;
Geralyn Ortea Perje, 39-anyos;
Jason Pia Lozada, 44-anyos;
Maricel Cruz Corre, 38-anyos;
Geralyn Ortea Perje, 39-anyos;
Charneth Corpuz, 18-anyos
Nakuha sa mga dinakpan ang nagkalain-laing mga branded nga sinena nga adunay bana-bana nga balor sa P100,000.
Sa eksklusibong pakighinabi sa Bombo Radyo Cebu Newsteam kang Police Lt. Col. Maria Theresa Macatangay, ang Deputy City Director for Operations sa Cebu City Police Office nga matod pa niadtong nakalabayng Lunes, Hulyo 7 nila nadawat ang impormasyon nga adunay dayo nga mga kawatan ang nangabot sa dakbayan.
Dali silang nakapa-alerto sa ilang sakop hinungdan sa dali mga mobilisasyon sa pagkasikop sa grupo.
Sa ilang imbestigasyon, nasayran nga dili lang ang Sugbo ang punterya sa grupo apan anaa sa ilang sunod nga target mao ang Cagayan de Oro City sa Northern Mindanao ug Iloilo City sa Western Visayas.
Dugang pa nga nasuta na sab sa kapulisan kung kinsa ang mga lokal nga mga contact niini ug kasamtangang gigukod sa ilang follow-up operation.
Modus operandi na kini sa grupo ang mangawat og mga sinena gikan sa lain dapit sa nasud dayon ipadala isip parcel ngadto sa kaulohan aron mabaligya.
Ang mga dinakpan kay nagdumili sa paghatag sa ilang habig kabahin sa pagkasikop nila gikan sa ilang binuhatan.