CEBU CITY-Emosyonal ang pamilyang Janson ug Baguio sa Barangay Ermita, dakbayan sa Sugbo, human nga malakip ang siyam niini ka mga kabanay sa nalunud nga MV Jenny Vince sa kadagatan sa Guimaras niadtung Agosto 3, pasado alas 12 sa udto.
Nanawagan si Marcialisa Janson, ang asawa ni Bernardo Janson, sa Cebu City Government, ingun man sa lokal nga pangagamhanan sa Guimaras nga tabangan sila arun nga madala dinhi sa dakbayan sa Sugbo ang mga patayng lawas sa ilahang kabanay nga lakip sa namatay sa nahisgutang aksidente sa kadagatan.
Matud ni Janson nga gusto nila nga madala na ang tanang patayng lawas sa ilahang kabanay arun nga ilaha kining mahaya ug tulu kaadlaw ingun man nga dungan nila nga malubong.
Sigon pa nga sakit nga palandungon nga buhi pa kini sa dihang mibiya ug patay na nga mubalik kanila.
Sakit man apan giingung angayan nila nga dawatun gumikan kay aksidente ang nahitabu.
Sakay sa MV Jenny Vince sila si Bernardo Janson, 58 anyus, Jared Janson, 4 anyus, Angelina Baguio, 56 anyus, Romeo Baguio Sr, 59 anyus, Romeo Baguio Jr, 28 anyus, Jay Arvin Baguio, 3 anyus, Romnel Baguio, 31 anyus, Danielle Baguio, 4 anyus ug Danilyn Baguio, 27 anyus.
Nasayran nga mipaingun sa Guimaras ang pamilyang Janson ug Baguio arun unta nga ubanan si Romeo Baguio, Jr. nga mamalaye sa fiancee niini nga si Maria Nieves Grandeza.
Una nga na identify ang patay nga lawas ni Romeo Bagiuo Sr. ug Romeo Baguio Jr. samtang wala pa nakita ug na-identify ang lawas sa lain pang 7 sa nagpadayon nga search and retrieval operation. (SBR/FDP)
