Niabot na sa Pilipinas ang 9 ka mga Pinoy kinsang mga biktima sa human trafficking sa Laos.
Diin sakay sila sa flight nga nitugpa sa Ninoy Aquino International Airport Terminal 3.
Matod sa Department of Migrant Workers, sila ang unang batch sa kinatibuk-ang 73 ka mga Pilipinong biktima nga naluwas gikan sa Golden Triangle Special Economic Zone sa probinsiya sa Bokeo sa Laos nga gikonsiderar nga scam syndicate.
Dugang sa ahensya, ang nasangpit nga gidaghanon sa mga trabahante gisaaran og trabaho isip customer service representative sa Thailand.
Apan, napugos hinuon sila sa paghimo og scamming activities sa Laos.
Kalabot niini, gipasalig ni Migrant Workers Secretary Hans Leo Cacdac nga mohatag ang gobyerno og hinabang alang sa mga naluwas nga mga Pilipino.
Samtang ang DMW kay makigtambayayong sa OWWA, ug sa Inter-Agency Council Against Trafficking sa paghatag og pinansyal nga tabang.
Maghatag usab kini og libreng psycho-social nga suporta, legal nga tabang ug uban pang serbisyo.
Samtang, ang Department of Foreign Affairs mao’y nangunay sa pagluwas sa maong mga biktima.
