CEBU CITY-Sikop ang 9 ka South Korean Nationals tungod sa illegal online gaming sa usa ka high end subdivision sa Banilad Cebu City. Kini pinaagi sa search warrant nga gisilbi sa Regional Intelligence Division (RID) sa Police Regional Office (PRO) 7.
Matud ni PSSUPT Jonathan Cabal ang hepe sa RID nga adunay report nga naka-abot sa ilang buhatan kalabot sa maong illegal gaming nga gihimo sa mga nahisgutang langyaw sa maong lugar mao nga ila kini nga gipaubos sa 2 ka buwang surveillance.
Nakuha gikan sa operasyon ang nagkalain-laing routers nga adunay paspas nga internet connection nga giingong maoy gamit sa illegal online gaming. Nakita usab mismo sa mga pulis ang pot o bet money sa maong duwa nga nagkantidad og 60 million US dollars nga nakabutang pa sa computer.
Nakuha usab ang pipila ka mga celphones ug nagkalain-laing passports nga gipanag-iya sa lain. Matud ni Cabal nga posibleng sa kakunsabo kini sa mga nadakpan.
Nakatakda nga mag-atubang og tukmang kaso ang mga Korean Nationals nga nasikop ug padayon karon nga giimbestigaran sa mga pulis ang sindicato nga naa sa likod niini.
Nasayran nga kini ang pinakadako nga transakyon sa tanang illegal gaming operation sa RID ug gisuta karon kung aduna bay mga local o mga Pilipino nga nalambigit sa maong iligal nga kalihokan.
