CEBU CITY-Gibutyag sa Cebu City Police Office (CCPO) nga kapin 9 milyon pesos nga balor sa ilegal nga drogas ang nasakmit samtang 147 ka indibidwal ang nadakpan sulod lamang sa usa ka semana nga operasyon.
Matod sa CCPO, miabot sa 1,298.83 gramos nga shabu nga adunay Dangerous Drug Board value nga P8,832,044.00 ang nasakmit gikan sa 34 ka mga operasyong gipahigayon sukad niadtong Hulyo 14 hangtod 20 karong tuiga.
Dugang pa, lima ka indibidwal ang arestado human nasakmit ang lima sab ka loose firearms sa ilang operasyon.
Batok sa illegal nga sugal, gideklarar usab sa CCPO nga lapas 49 ka operasyon ang ilang gibuhat kon asa ilang nasakmit ang P4,893 nga kantidad sa salapi ug nasikop ang 85 ka mga indibidwal.
Giaksyonan usab sa CCPO ang wanted person diin 19 ka Other Wanted Persons ang nadakpan gikan sa 81 ka operasyon nga gipahigayon.
Giklaro sa CCPO nga padayon ang ilang pagduso sa maong kalihokan aron momenos na ang kaso sa krimen sa dakbayan sa Sugbo sa mga niaging semana.
