PASIG CITY – Kalapasan sa Republic Act 9208 o Anti-Trafficking in Persons Act ang kaso nga posibling ipasaka batok kang Danica, ang 22-anyos nga inahan gikan sa Pasig City nga gibaligya ang kaugalingong anak niadtong Marso 3, 2022.
Matud ni Danica, gibaligya niini ang iyahang siyam ka buwan nga anak nga babaye sa kantidad nga P45,000 gumikan kay naputos kini sa utang sa dihang nagumon sa online sabong.
Gibutyag ni Danica nga andam kini nga mapasakaan ug kaso basta mabalik lang ang iyahang anak nga iyahang gibaligya.
Positibo ang resulta sa pagpangita sa gibaligya nga masuso nga naluwas sa mga tawo sa NBI Anti-Human Trafficking Division sa Sta. Cruz, Laguna niadtong Martes, Marso 22.
Gidakop sa mga otoridad gikan sa National Bureau of Investigation (NBI) si Imelda Malibiran ug ang iyahang Nigerian husband nga si Maxwell Bright gumikan sa ilahang pagpalit sa masuso gikan sa tawo nga gibaligyaan ni Danica sa Quezon City niadtong Marso 3.
Nagpasalamat ang bana ni Danica sa NBI gumikan kay sa nakalabay nga 19 kaadlaw, naluwas ang ilahang anak ug nabalik ang ilahang anak nga gibaligya sa iyahang misis.
