CENTRAL VISAYAS-Labing minos 92 ka mga mag-uuma sa humay sa habagatang Sugbo ang nakadawat og Fertilizer Discount Voucher (FDV) gikan sa Department of Agriculture sa Central Visayas (DA-7) niadtong Miyerkules, Septiyembre 20, 2023.
Sa ihap, 87 gikan sa Carcar City, tulo sa Sibonga, ug duha sa Minglanilla.
Matod ni Melquiades Ibarra, information officer sa DA-7, matag usa sa mga mag-uuma nakadawat og FDV nga nagkantidad og P4,000.
Ang mga benepisyaryo nipailawom sa data verification ug validation nga makita sa master lists nga nakuha gikan sa Farmers and Fisherfolk Registry System (FFRS) base sa Registry System of Basic Sectors in Agriculture (RSBSA).
Atol sa FDV distribution, giimbitar usab sa DA-7 ang mga accredited nga fertilizer merchant aron makapalit dayon ang mga mag-uuma sa bugas gamit ang voucher nga ilang nadawat.
Ang pag-apod-apod sa FDV gibase sa Memorandum Circular No. 22 o ang Revised Implementing Guidelines sa Kadiwa Financial Grant Assistance Program.
Gimugna ang programa aron ma-capacitate ang mga mag-uuma ug makatabang sa pagsulbad sa ilang mga limitasyon, sama sa abilidad sa pagsuplay sa mga kinahanglanon sa mga institutional buyers, efficiency sa pagdala sa ilang agri-products, kapasidad sa pagpamaligya sa ilang produkto, ug efficiency sa ilang pre-harvest, post-harvest ug mga kalihokan sa pagdugang og bili.
