CEBU CITY – Gituohan sa Cebu City Police Office (CCPO) nga gumikan sa hugot nga pagpatuman sa kapulisan sa minimum health protocols, nagka-ubos ang kaso sa COVID-19 sa dakbayan sa Sugbo.
Mikabat sa 9,474 ka mga indibidwal ang ilahang nadakpan gumikan sa paglapas sa mga protocols sulod lang sa buwan sa Agosto, diin sa maong ihap, 7,503 ang mga hamtong ug 1,971 ang mga menor de edad kinsang gipang-rescue sa kapulisan.
Gibutyag ni CCPO Director Police Colonel Josefino Ligan nga kadaghanan sa ilahang na-apprehend sa nakalabay nga buwan ang natala sa ikaduhang semana, diin mikabat kini sa 406 ug 445 ang na-apprehend sa Agosto 18 ug Agosto 21.
Sa 9,474 ka mga indibidwal, 6,623 niini ang nadakpan gumikan sa paglapas sa curfew hours, 3,246 ang mga wala nagsul-ob ug face masks, ug 50 sa liquor ban.
Gihimug-atan ni Ligan nga gumikan sa istrikto nga pagpatuman sa mga protocols hayan posibli nga nakatabang kini sa pagpaubos sa active cases ilabi na sa mga area nga nahisakop sa Sawang Calero Police Station (PS 6), ug Carbon Police Station (PS 5).
Samtang, gipahibalo usab niini nga sa ikaduhang semana sa buwan sa Agosto, napulo ka mga barangay ang ilahang natala diin gikan ang daghang mga menor de edad nga ilahang ma-rescue, ug kini ang barangay Guadalupe, Calamba, Talamban, Tejero, Sawang Calero, Kalunasan, San Nicolas, Mabini, Lahug ug Ermita.
QUARANTINE VIOLATORS
Gitino sa Cebu City Police Office (CCPO) nga wala kini sila mikwestyon sa trabaho sa mga barangay officials sa pagpatuman sa mga gitakda nga lagda sa dakbayan sa Sugbo diin ubos pa sa Modified Enhanced Community Quarantine (MECQ).
Matud ni Police Lieutenant Colonel Wilbert Parilla, ang Deputy Chief for Operations sa CCPO, nga igo lang nila gikwestyon ang ‘intervention’ sa mga barangay sa nagkadaghan nga mga menor de edad nga ma-‘apprehend’ sa kapulisan o sa mga sakop sa PROBE, kinsang migawas ug naglaroy-laroy bisan ug dili importante ang lakaw.
Sigon pa nga wala usab ma-monitor kung ang mga ginikanan ba niining mga menor de edad ang nakabayad sa multa o gipaubos ba kini sila ug community service.
Gibutyag ni Parilla nga bisan pa man sa taas nga panahon nga gipatuman ang mga lagda, sa gihapon, giingong nagkadaghan ang ilahang mga madakpan nga ‘violators’ ug gani malakip na niini ang mga menor de edad nga dili unta angayan nga makagawas ubos sa lagda sa MECQ.
Gituohan ni PLt. Colonel Parilla nga dako ug papel ang mga barangay officials sa pagbadlong sa ilahang mga konstituwente.// GBR, EKP
