CEBU – Patay ang usa ka tuig nga bata ug duha ang nadala sa tambalanan human nga nalatayan ug Ceres bus diha sa may National Highway, South Poblacion, dakbayan sa Naga, probinsiya sa Sugbo kagabii.
Giila ang namatay nga si Lemelfa Umayao, 1-year-old, samtang nalandig sa tambalanan ang inahan niini nga si Maria Josefa Umayao, 27 anyus, ug si Frenchie Cabrera, 13 anyus ug pulus mga taga North Poblacion, lungsud sa San Fernando.
Gisaysay ni SPO1 Reynato Masangcay nga pa-South bound ang mga biktima ingun man ang Ceres bus sa dihang nahitabu ang insidente.
Matud pa nga anaa sa outer lane ang mga biktima sakay sa usa ka motorsiklo sa dihang mi-overtake ang nahisgutang bus sa usa ka tricycle ug sa dihang mi-right turn hayan nadagit gayud ang mga biktima.
Nalagput ang tulu ug didtu nalatayan sa bus ang usa ka tuig nga bata hinungdan sa pagka-pisat sa ulo niini.
Sa pagkakarun, nagtingkagol na ang driver sa bus nga si Jay Bersero, 33 anyus, ug mag-atubang ug kasong reckless imprudence resulting to homicide ug multiple physical injury.
