CEBU CITY – Natuldukan na ang pagtagu-tagu sa giisip nga murderer kinsang mipatay sa koreano sulud sa usa ka hotel dinhi sa dakbayan sa Sugbo niadtung
Agosto 26 ning kasamtangang tuig.
Nasikup sa mga sakup sa Mabolo Police Station inubanan sa Consolacion Police Station, ang suspetsadu nga giilang si
Jessie Casada alyas Kano, 34 anyus, ug taga lungsud sa Consolacion, probinsiya sa Sugbo.
Gisaysay ni Police C/Insp Dindo Juanito Alaras, hepe sa Mabolo
Police Station, gisundan na nila ang suspek sugud nga ilahang nakita ang identity niini sa CCTV footage sa hotel kung diin nahitabu ang krimen.
Apan giangkun sa hepe nga dili sayun ang pagdakup sa suspek gumikan kay idlas ug na-ilhan lang kini sa ngalan nga Kano.
Nasayran usab nga aduna na kini mga pending nga warrant of arrest sa kasong murder.
Matud pa sa hepe nga daghan na kini ug kasong pagpatay ug katapusan niini nga napatay ang nahisgutang Koreano.
Dugang pa ni Alaras nga kaso sa iligal nga drugas ug love triangle ang ilahang gilantaw nga motibo sa krimen.
Samtang giangkun usab sa suspek ang krimen ug sigon pa nga nakit-an niini ang iyahang kapuyu ug ang Koreano nga nag-uban hinungdan sa iyahang kasuku.
Lakip sa nasikup mao sila si Ajie Soguilon, 18 anyus, live-in partner sa suspek, ug ang inahan niini nga si Arlene Soguilon.
Nakuha-an kini sila ug nubaine ingun man ang medium ug small pack nga shabu.
Kahinumduman niadtung Agosto 26, gipusil patay sa nahisgutang suspek ang koreano nga si Youngho Lee sulud mismo sa hotel kung diin nag-stay ang maong langyaw.
