CEBU CITY-Retrieval operation na ang gipahigayon karon sa Consolacion landfill arun sa pagrekober sa lawas sa garbage truck driver nga nalubung buhi sa mga basura sa nakalabay nga adlaw Sabado sa hapon.
Gibutyag ni Danilo Campangpangan, ang head sa Disaster Team sa lungsod sa Consolacion nga taas na ang oras nga wala pa nila makaplagi ang drayber nga si Rudolfo Malasaga, ingun man nga tulu ka adlaw na ang ilahang pagpangita niini hinungdan nga ilaha nang gipahigayun ang retrieval operation.
Matud ni Campangpangan nga wala na’y “signs of life” sa drayber hayan ipadayun nila ang pagkuykuy sa pagkuha na lang sa lawas niini.
Sa pagkakarun, gihunung una ang paglabay sa mga basura sa nahisgutang landfill sa Barangay Polog, gumikan sa nagpadayun nga operasyon sa mga rescuers.
Nasayran nga gawas sa disaster team sa Consolacion, giingung ang nangulo gayud sa operasyon mao ang team sa Asian Energy Systems Corp., ang kompanya nga nag-operate sa nahisgutang private landfill. (SBR)
