CEBU CITY-Kuwang sa ‘financial literacy’ kun edukasyon sa natad sa pinansyal nga aspeto ang mga Pilipino hinungdan nga nahaylo kini sa mga investment scam.
Kini ang gibutyag sa financial advisor nga si Michael Anthony Curan.
Mipahimangno si Curan sa publiko batok niining mga naasoy nga investment scam nga angayang bantayan kung ang usa ka tao mutanyag og investment apan walay produkto nga makita.
Angayan matud pa nga ang publiko magpakisayod gyud usa, sa dili pa musulod sa mga sama nga scam. Sutaon kung kini ba nakarehistro sa Security Exchange Commission (SEC).
Subo usab matud pa palandungon nga tungod sa kakabos mao nga mapugos ang mga tao ug mahaylo sa mga “easy money” offers.
Gihimug-atan ni Curan nga angayan gyud nga imbestigaran ug asa mupadulong ang kwarta nga gihago-an.Gitino pa niini nga bisan paman sa legit nga investment, risgo sa gihapon.
Wala gihapon garantiya nga ang imong kwarta mulambo tungod kay magdepende man kini sa ‘market’ sa nasud sanglit di man sa tanang higayon musaka kini.
