CEBU CITY-Patay ang kanhi seaman human gipusil sa makadaghang higayon sa Purok 1 Bato dakbayan sa Toledo.
Naila ang biktima nga si Ronnie Sy Obenza, 58 anyos ug nagpuyo sa naasoy nga dapit.
Sa inisyal nga imbestigasyon, sakay matud pa ang biktima ug nagdrive sa iyang bisikleta samtang padulong na uli sa ilang panimalay gikan sa Proper Bato.
Apan wala na niini mahimo nga musulod sa iyang balay tungod kay dunay kalit nga mitumaw nga motorsiklo sakay ang usa ka lalaki dayong pusil sa biktima sa makadaghang higayon.
Naka-angkon og nagkadaiyang samad pinusilan ang biktima sa iyang lawas hinungdan sa iyang hinanaling kamatayon. Dali usab nga miikyas ang wala matino nga mamumuno.
Padayon pa usab karon nga giimbestigaran sa Toledo PNP ang motibo sa pagpamusil ug padayong gisuta ang background sa biktima.
