CEBU CITY – Nasikup ang usa ka 24 anyus nga babaye ug ang kabit niini human nga naaktuhan sulud sa usa ka motel sa Ponce II, Barangay Carreta, dakbayan sa Sugbo.
Giila ang mga dinakpan nga sila si Mylene Patindol, 24 anyus, ug ang kabit niini nga si Jeremiah Mendoza, 48 anyus, minyu, samtang ang nagreklamu ang mister ni Mylene nga si Rubert Patindol, 28 anyus ug usa ka seaman.
Gisaysay ni Police Staff Sergeant Jesuralimo Vallespin sa Waterfront Police Station nga nangayu ug tabang ang mister kanila sa dihang nasayran niini nga anaa sulud sa motel ang iyahang asawa ug ang kabit niini.
Gipahigayun ang operasyon ug positibo nga nakita ang duha sulud sa kwarto hinungdan nga dali kining gisikup pinaagi sa usa ka citizen’s arrest.
Una niini, gi-asuy sa mister nga tuig 2013 pa ang kinawat-kawat nga relasyon sa iyahang asawa ug sa kabit niini apan wala kini nakuha nga ebidensya gawas na lang sa mga chat messages sa social media.
Wala usab niini masundan ang matag lihuk sa iyahang asawa gumikan kay kanunay man usab kining anaa sa barko.
Sa iyahang pag-uli, gi-obserbaran niini ang lihuk sa iyahang asawa ug atul nga nananghid kini nga mupaingun dinhi sa syudad hinungdan nga iyaha kining gisundan.
Nakita niini nga adunay kauban nga lalaki ang iyahang asawa ug misulud ang duha sa motel.
Kasong adultery ang gipasaka nga kaso sa bana batuk sa iyahang asawa.
