CEBU CITY-Nakauli na gikan sa tambalanan ang 8 sa 11 ka mga girls scout nga nahilo matud pa sa fried rice atol sa camping niini sa Manguaio Ntl. Highschool sa lungsod sa Asturias probinsya sa Sugbo.
Matud ni Police Staff Sergeant Bendi Nuñez sa Asturias Police Station nga niadtong Oktubre 5 nagpahigayon og camping ang naasoy nga girls scouts.
Ang bahaw matud pa niini nga kan-on sa nakalabay nga adlaw ang giluto pagka Biyernes ug gisagolan og pork gisado kung diin gikaon sa mga bata pagka udto na.
Sa susamang adlaw sigon ni Nuñez, nakasinati na og pagsakit sa tiyan ang mga bata hinungdan nga gidala dayon kini sa tambalanan.
Sa karon duna pa’y 3 ka buok ang naa sa Rural Health Unit (RHU) infirmary ug padayon pa nga gi-obserbaran.
Padayon usab karon ang pagsuta sa tinood nga hinungdan sa pagkahilo sa naaoy nga mga girls scout.
