CEBU CITY-Anaa na sa luwas nga kahimtang ang magti-ayong senior citizen human mabunalan og kahoy’ng binugha sa usa ka tulisan sa ilang panimalay sa Brgy. Linut-od, sa lungsod sa Argao, Cebu.
Giila ang mga biktima nga sila si Margarito Sardido, 85 anyos, ug kapikas niining si Romualda Sardido, 83 anyos, kinsang puros manindahay og otanon.
Matud ni Patrolman Cirry Chavez sa Argao Police Station, nga misuway og sulod ang tulisan kinsang nagtaptap sa iyang nawong sa panimalay sa magtiayon.
Sa dihang nabantayan ni Romualda nga misulod sa ilang panimalay ang wala mailhing kawatan, mikuha kini og binughang kahoy ug gibunal niini sa kawatan.Apan nailog sa kawatan ang kahoy ug gipuspusan ang ulo sa lola.
Dugang pa ni Chavez nga naabtan ni Margarito ang maong panghitabo ug inay nga makatabang lakip usab kining gipuspusan sa suspect.
Miikyas dayon ang wala mailhing tulisan dala ang 1,000 pesos nga giingong halin sa mga tiguwang.
Daling hioong gidala sa tambalanan ang magtiayon human nga naka-angkon og samad sa ilang ulo.
Padayon usab ang imbestigasyon sa kapulisan sa naasoy nga insidente. (GN)
