Andam nga makig-alayon ang Cebu City Government sa tinuig nga nationwide bloodletting activity sa Bombo Radyo Philippines, nga mao ang Dugong Bombo 2019.
Gihangop ni Cebu City Mayor Edgardo Labella ang corporate social responsibility sa network ilabi na nga nagkasaka ang kaso sa dengue sa dakbayan.
Sa datos gikan sa Cebu City Health Department, anaa sa 2,215 ang nataptan sa sakit nga dengue niadtong Enero 1 hangtud sa Oktubre 19 diin 15 niini ang namatay.
Sa maong datos, misaka og 5.63 percent ang dengue cases itandi sa miaging tuig.
Hinungdan nga gipasalamatan ni Mayor Labella ang Bombo Radyo alang sa maong bloodletting activity ilabi na nga makatabang ang donated nga dugo alang sa mga nanginahanglan niini.
Sa laing bahin, gibutyag ni Labella nga gipatuman sa City Health Department ang mga interventions aron makalikay sa maong makamatay nga sakit.
Gihimug-atan usab ni Labella nga imentenar ang kahinlo sa tagsa-tagsa ka mga tugkaran ilabi na kadtong mga pondohanan sa tubig aron dili na mangitlog ang mga lamok nga adunay dengue virus.
Nanghinaut ang mayor sa dakbayan nga pinaagi sa pagtinabangay sa katawhan malikayan gayud ang sakit nga dengue.
