CEBU CITY — Gipatuman sa Cebu South Bus Terminal ang hugot nga seguridad subay na sa pagdasok sa mga mobakasyon sa tagsa-tagsa ka mga probinsya ning bisperas sa kalagkalag.
Nagbantay ang mga sakop sa PNP ug AFP alang sa pagmentenar sa kalinaw ug kahapsay sa terminal ilabi na nga daghang mga estudyante ug trabahante ang mosakay sa bus paingon sa tagsa-tagsa ka destinasyon.
Matud ni Francis Kaamiño, ang administrative aide sa Land Transportation Franchising and Regulatory Board (LTFRB)-7, nga giinspeksyunan nila ang mga bus kung anaa ba sa maayong kondisyon.
Gisuta sa mga sakop sa LTFRB ang kondisyon sa sakyanan sama lang sa ligid niii, mga importanteng dokumento, ug kondisyon sa driver sa dili pa kini molarga.
Naka-standby usab ang Malasakit Lounge alang sa mga gustong mosumbong, ingon man sa uban pang mga concerns.
Mitambag usab si Kaamiño nga timan-an gayud ang pangalan sa driver ug plate number sa bus inig sumbong sa otoridad.
Gipatuman gihapon ang no ticket, no entry policy sulod sa South Bus terminal.
Mibisita si Cebu Governor Gwendolyn Garcia sa Cebu South Bus Terminal ug sa Malasakit Lounge alang sa pagsuta sa kahimtang subay na sa pagdasok sa mga pasahero.
