Gipalapdan sa Cebu Provincial Government ang pag-ban sa mga pork products gikan sa Luzon, ug karon gilakip nila ang Eastern Visayas.
Kini subay na sa hugot nga monitoring aron dili makasulod sa nasud ang African Swine Fever (ASF).
Base sa Executive Order No. 27 nga giluwat ni Governor Gwendolyn Garcia, delikado alang sa mga babuyan sa lalawigan ang mga pork products gikan sa Eastern Visayas.
Nakalatid sa maong kamanduan ang maong lugar maoy magsilbing transshipment point alang sa mga produkto gikan sa Luzon nga gustong makasulod sa merkado sa Sugbo.
Nasayran gikan sa Provincial Veterinary Office nga gilibkas sa mga probinsya sa Eastern Visayas ang ilang pork entry ban.
Sa kasamtangan, gipatuman ang pork entry ban sa tibuok lalawigan sa Sugbo hangtud sa Hunyo 2020.
Una nang nagkanayon si Garcia nga tuyong gipatuman ang pagbabag sa mga baboy ug pork products gikan sa Luzon aron maprotektahan ang P11-billion hog industry sa probinsya.
