CEBU CITY – Giisip ni Ustadz Najeeb Razul, Muslim elder sa Sugbo, nga usa ka ‘welcome development’ ang ‘guilty verdict’ ni Hon. Judge Jocelyn Solis-Reyes batok sa mga akusado sa Maguindanao massacre case.
Matud ni Razul nga angayan lang nga makab-ot sa pamilya sa mga biktima ang hustisya nga dugay na nilang gipangandoy.
Bisan pa man nga milanat kini ug kapin sa napulo katuig ang maong kaso, sa katapusan nakab-ot gayud ang pinal nga desisyon sa korte nga pabor sa mga biktima.
Apan wala matagbaw si Razul sa civil damages nga bayaran sa mga akusado hayan sugyot niini kung mahimo pa sa korte, giingong mas maayo unta nga mabaligya ang tanang kabtangan sa mga Ampatuan ug ipang-apud-apud kini sa pamilya sa mga biktima.
Nagkanayon si Razul nga gikinahanglan gayud nga atubangon sa mga Ampatuan ang silot sa usa ka binuhatan nga sila lang usab ang nagbuhat gumikan lang sa gahum sa politika.
