Halos nangharos ang dakbayan sa Carcar isip mga mananaug sa nakalabay nga Sinulog sa Kabataan sa Lalawigan 2020 nga gipahigayon kagahapon sa Cebu City Sports Complex.
Una niini, nakita sa mga nanan-aw ang mabulukong performance sa mga contingents gikan sa managlahing kalungsuran sa Sugbo pinaagi sa street parade.
Gisubay sa mga batan-ong mananayaw ang dalan Osmeña Boulevard padung sa CCSC suot ang ilang maanindot nga costume.
Gipamatuod sa mga tinun-an sa Carcar City Division pinaagi sa ilang ritual showdown performance nga ang pagtuo ni Señor Sto. Niño maoy nakapalig-on sa usa ka tawo bisan pa man sa mga hagit nga naagi-an sa kinabuhi.
Tungod niini, nag-una ang mga pambato sa Carcar sa Ritual Tradition, Best in Costume, ug Best in Musicality.
Nahimong second placer sa ritual showdown ang dakbayan sa Talisay, 3rd placer ang Lapu-Lapu City, 4th placer ang Bogo City, 5th placer ang Toledo City, ug 6th placer usab ang lungsod sa Ginatilan.
Sa street dancing category, nakadaug ang Talisay City isip 1st place, Carcar City sa 2nd place, ug Lapu-lapu City sa 3rd place.
Sa best in musicality, nag-una ang contingent gikan sa Carcar City, ug gisundan kini sa Talisay City, Lapu-Lapu, Bogo, ug Toledo City.
